बदलापूरमध्ये पत्नीकडून पतीची हत्या; प्रियकरासह गळा दाबून मृतदेह नदीत फेकला
ठाणे : बदलापूर परिसरात एक हृदयद्रावक घटना घडली आहे. ४४ वर्षीय
किशन परमार या व्यक्तीची पत्नी मनीषा परमार आणि तिचा प्रियकर लक्ष्मण भोईर यांनी
मिळून गळा दाबून हत्या केली. हत्येनंतर दोघांनी मृतदेह नदीत फेकून फरार झाले.
पोलिसांनी शनिवारी हा प्रकार उघड केला असून, दोन्ही आरोपींचा शोध सुरू आहे. पोलिसांच्या
माहितीनुसार, आरोपी मनीषा आणि लक्ष्मण भोईर हे दोघे शेजारी
होते आणि त्यांच्यात अनैतिक संबंध होते. ही बाब पती किशन परमार यांच्या लक्षात
आल्यानंतर त्यांनी पत्नीला जाब विचारला. त्यातून झालेल्या वादातून हत्येचा प्रकार
घडला. या वादात दोघांनी मिळून रस्सीने किशन परमार यांचा गळा दाबून ठार मारले,
त्यानंतर मृतदेह चादरीत गुंडाळून नदीत फेकून दिला. गुरुवारी रात्री
नदीत सापडलेला मृतदेह पोलिसांनी ताब्यात घेतला. या प्रकरणी भा.दं.सं. कलम 103(1)
(हत्या) आणि 238 (पुरावे नष्ट करणे) अंतर्गत
गुन्हा दाखल करण्यात आला आहे. मात्र आरोपी अद्याप फरार असून त्यांचा शोध सुरू आहे.
शंका आणि आणखी एक हत्या:
याच पार्श्वभूमीवर उत्तर प्रदेशातील पीलीभीत येथे आणखी एक
खळबळजनक घटना घडली आहे. राम बहादूर नावाच्या व्यक्तीने पत्नी अनिता हिच्या अनैतिक
संबंधांच्या संशयावरून तिच्यावर दांडक्याने वार करून हत्या केली. गंभीर जखमी
अवस्थेत अनिताला रुग्णालयात नेण्यात आले, मात्र रस्त्यातच तिचा मृत्यू झाला.
पोलिसांनी या प्रकरणात गुन्हा दाखल करून फरार पतीचा शोध सुरू केला आहे.
