भरधाव मोटारसायकलची ११ वर्षीय शाळकरी मुलाला धडक; जखमीला मदत न करताच चालक पसार
न्हावरे : पुणे जिल्ह्यातील शिरूर तालुक्यात भरधाव
मोटारसायकलने सायकलवरून जाणाऱ्या ११ वर्षीय शाळकरी मुलाला पाठीमागून जोरदार धडक
दिल्याची घटना घडली आहे. या अपघातात कृष्णा विलास आडसुरे हा मुलगा गंभीर जखमी झाला
आहे. विशेष म्हणजे, अपघातानंतर जखमी मुलाला वैद्यकीय मदत न
करता मोटारसायकल चालक घटनास्थळावरून पसार झाल्याचा आरोप आहे.
गुनाट ते शिंदोडी रस्त्यावर अपघात
ही घटना २७ ऑक्टोबर २०२६ रोजी दुपारी सुमारे ४ वाजून १० मिनिटांच्या सुमारास शिरूर पोलीस ठाण्याच्या हद्दीतील गुनाट ते शिंदोडी रस्त्यावर घडली. कृष्णा विलास आडसुरे (वय ११, रा. शिंदोडी रोड, गुनाट, ता. शिरूर, जि. पुणे) हा सायकलवरून जात असताना भरधाव मोटारसायकलने त्याला पाठीमागून धडक दिली. या धडकेत कृष्णाच्या डोक्याला, नाकाला, तोंडाला आणि हनुवटीला गंभीर दुखापत झाली. तसेच त्याच्या दोन्ही हातांना आणि पायांनाही दुखापत झाली असून सायकलचेही नुकसान झाले आहे.
चालकाविरुद्ध गुन्हा दाखल
या प्रकरणी भाऊसाहेब पोपट आडसुरे (वय ४५, रा. गुनाट, ता. शिरूर) यांनी शिरूर पोलीस ठाण्यात फिर्याद दिली आहे. त्यांच्या फिर्यादीवरून बाल्या चव्हाण (पूर्ण नाव माहीत नाही, रा. शिंदोडी, पो. निमोणे, ता. शिरूर, जि. पुणे) या मोटारसायकल चालकाविरुद्ध भारतीय न्याय संहिता आणि मोटार वाहन कायद्यानुसार गुन्हा दाखल करण्यात आला आहे. फिर्यादीनुसार, संबंधित चालकाने वाहतुकीच्या नियमांकडे दुर्लक्ष करून भरधाव आणि निष्काळजीपणे मोटारसायकल चालवली. त्यामुळे सायकलवरून जाणाऱ्या मुलाला पाठीमागून धडक बसली. अपघातानंतर जखमी मुलाची विचारपूस न करता किंवा त्याला वैद्यकीय मदत मिळवून न देता चालक घटनास्थळावरून पळून गेल्याचा आरोपही फिर्यादीत करण्यात आला आहे. या प्रकरणाचा पुढील तपास पोलीस हवालदार प्रताप टेंगले करीत आहेत.
