मंगळवेढ्यात कौटुंबिक वादातून मुलाकडून जन्मदात्या पित्याचा निघृण खून

सोलापूर : सोलापूर जिल्ह्यातील मंगळवेढा तालुक्यातील डोणज गावात वडील-मुलामधील दीर्घकाळ चाललेल्या कौटुंबिक वादातून एक धक्कादायक घटना घडली आहे. शेतातील वाटणी, जनावरे पिकात जाणे तसेच घरात पाणी भरू न देणे, या कारणांवरून सुरू असलेल्या भांडणाचा राग मनात धरून मुलानेच जन्मदात्या पित्याचा निघृण खून केला. ही घटना १९ डिसेंबर रोजी सायंकाळी ५ ते ७:३० वाजण्याच्या सुमारास डोणज येथील अशोक रामचंद्र मलगोंडे यांच्या पडीक जमिनीत घडली. महादेव कुसाप्पा पुजारी (वय ७०) असे मयत पित्याचे नाव असून, आरोपी मुलगा काशिनाथ महादेव पुजारी (वय ४०) यास मंगळवेढा पोलिसांनी अटक केली आहे. मिळालेल्या माहितीनुसार, शेतवाटप व जनावरांच्या वादावरून वडील-मुलामध्ये वारंवार खटके उडत होते. याच रागातून आरोपी काशिनाथने वडिलांच्या डोक्यात दगड घालून गंभीर दुखापत केली. उपचारापूर्वीच महादेव पुजारी यांचा मृत्यू झाला.

या प्रकरणी विकास विश्वल कोरे (वय २२, रा. डोणज) यांनी मंगळवेढा पोलिस ठाण्यात फिर्याद दिली आहे. त्यांच्या तक्रारीवरून बीएनएस कलम १०३ (१) अन्वये गुन्हा नोंद करण्यात आला आहे. पुढील तपास पोलिस निरीक्षक दत्तात्रय बोरिगिड्डे यांच्या मार्गदर्शनाखाली फौजदार बनकर करत आहेत.

नशेचा अंमल, वादाची ठिणगी घटनेच्या दिवशी आरोपी काशिनाथ पुजारी हा अमावास्येनिमित्त आरकेरी येथील देवस्थानला जाऊन आला होता. घरी परतल्यानंतर दारू पिऊन नशेत असतानाच त्याने हे टोकाचे पाऊल उचलल्याची चर्चा आहे. आरोपी व्यसनाधीन असल्याने मालमत्ता खर्च होऊ नये, म्हणून वडिलांनी जमीन वाटपास नकार दिला होता, अशीही माहिती गावात चर्चिली जात आहे. या घटनेमुळे डोणज परिसरात एकच खळबळ उडाली आहे.