संजय राऊत यांची तब्येत बिघडली; खासदार फोर्टिस रुग्णालयात दाखल

मुंबई: शिवसेना (उद्धव बाळासाहेब ठाकरे) पक्षाचे नेते आणि खासदार संजय राऊत यांची तब्येत अचानक बिघडल्यामुळे त्यांना मुंबईतील भांडुप येथील फोर्टिस रुग्णालयात दाखल करण्यात आले आहे. त्यांच्या प्रकृती अस्वास्थ्यामुळे तातडीने त्यांना रुग्णालयात नेण्यात आले. मिळालेल्या माहितीनुसार, खासदार राऊत यांनी काही दिवसांपूर्वी याच फोर्टिस हॉस्पिटलमध्ये रक्त तपासणी केली होती. प्रकृती बिघडल्यामुळे खबरदारीचा उपाय म्हणून त्यांना ॲडमिट करण्यात आले आहे. सध्या त्यांच्या प्रकृतीबद्दल अधिकृत माहिती समोर आलेली नसली तरी डॉक्टरांच्या देखरेखीखाली त्यांच्यावर उपचार सुरू आहेत. संजय राऊत यांना यापूर्वी हृदयविकाराचा त्रास झालेला असून, त्यांच्यावर दोन वेळा अँजिओप्लास्टी (Angioplasty) शस्त्रक्रिया करण्यात आल्या आहेत. पहिली अँजिओप्लास्टी: नोव्हेंबर २०१९ मध्ये लीलावती रुग्णालयात करण्यात आली होती. त्यावेळी त्यांच्या हृदयात दोन स्टेंट्स बसवण्यात आले. दुसरी अँजिओप्लास्टी: डिसेंबर २०२० मध्ये पुन्हा एकदा शस्त्रक्रिया करण्यात आली होती, ज्यात आधीच्या स्टेंट्सपैकी एकामध्ये ब्लॉकेज आढळल्याने आणखी स्टेंट बसवण्यात आले. राऊत यांच्या तब्येतीबद्दल सध्या शिवसेना नेत्यांकडून आणि रुग्णालय प्रशासनाकडून अधिकृत निवेदन आलेले नाही. मात्र, पक्ष कार्यकर्ते आणि समर्थकांनी त्यांच्या लवकरात लवकर प्रकृतीत सुधारणा व्हावी अशी प्रार्थना व्यक्त केली आहे.