सोशल मीडियावरील टीकेनंतर इंदुरीकर महाराजांचा मोठा निर्णय; “माझ्या लेकरांवर बोललात, आता थांबतो”

प्रसिद्ध कीर्तनकार इंदुरीकर महाराज यांनी सोशल मीडियावरील वैयक्तिक टीका आणि त्यांच्या कुटुंबावरील हल्ल्यांमुळे अखेर कीर्तन सोडण्याचा संकेत दिला आहे. अलीकडेच त्यांच्या मुलीचा साखरपुडा पार पडला होता. त्या समारंभातील काही फोटो आणि व्हिडिओ सोशल मीडियावर व्हायरल झाले, त्यानंतर काही लोकांनी त्यांच्या मुलीच्या कपड्यांवरून आक्षेपार्ह कमेंट्स केल्या. एका व्हिडिओत महाराज भावनिक होत म्हणाले, “लोक आता इतके खालच्या पातळीवर गेलेत की माझ्या मुलीच्या कपड्यांवरून कमेंट्स करत आहेत. तुम्ही मला शिव्या द्या, मला घोडे लावा, पण माझ्या लेकरांवर बोलू नका. आयुष्यभर लोकांची सेवा केली, चांगलं केलं पण आता वैयक्तिक आयुष्यावर येऊन ठेपलंय.” महाराजांनी सांगितलं की, त्यांच्या कुटुंबाने कधीच प्रसिद्धीचा मोह ठेवला नाही, परंतु काही लोकांनी सोशल मीडियावरून त्यांच्या खासगी आयुष्यावर अनाठायी चर्चा केल्याने त्यांना मानसिक त्रास झाला आहे. ते पुढे म्हणाले, “३१ वर्ष मी कीर्तन केलं, लोकांना मार्गदर्शन केलं, पण आता कंटाळलो आहे. मी दोन-तीन दिवसांत मोठा निर्णय घेणार आहे. माझ्यात अजून उत्तर द्यायची ताकद आहे, पण आता हे सगळं माझ्या घरा पर्यंत पोहचलं आहे.” महाराज म्हणाले, “मी आजही समर्थ आहे उत्तर द्यायला, पण मला आता शांतता हवी आहे. माझ्या लेकरांच्या कपड्यांवर बोलणाऱ्यांना तरी लाज वाटली पाहिजे. आता मी काही दिवसांत निर्णय घेईन.” हा व्हिडिओ व्हायरल झाल्यानंतर सोशल मीडियावर इंदुरीकर महाराजांच्या समर्थकांचा उद्रेक झाला. अनेकांनी लिहिलं की, “महाराज, वाईट प्रवृत्तीचे लोक समाजात असतात, पण तुमचा आवाज आणि कीर्तन हे अनेकांच्या श्रद्धेचा आधार आहे, त्यामुळे कीर्तन बंद करण्याचा निर्णय घेऊ नका.”